‘n Wêreld van plante

Wanneer ’n mens aan Namakwaland dink, sien jy maklik die eindelose blomvelde van die lente voor jou. Maar die ware plantwonder van Namakwaland lê veel dieper as die paar weke waarin die veld in kleur ontplof.

Namakwaland vorm deel van die Sukkulente Karoo – ’n streek wat wêreldwyd bekend is vir sy buitengewone verskeidenheid plante. Na raming kom daar sowat 3 500 plantspesies in Namakwaland voor, waarvan meer as 1 000 nêrens anders op aarde natuurlik voorkom nie.

Hier groei plante wat geleer het om in ’n harde, droë wêreld te oorleef. Vygies bêre water in hul vlesige blare, klein vetplante skuil tussen klippe en in rotsskeure, en bolplante wag soms maande lank onder die grond vir die regte reën en temperatuur voordat hulle weer verskyn. Onder Namakwaland se kenmerkende plante tel vygies, crassulas, pelargoniums, lachenalias en talle ander bol- en vetplante. Die Kamiesberge is op hul eie besonders ryk aan plante wat tot ’n baie beperkte gebied beperk is.

En dan kom die winterreën.

Skielik verskyn daar tussen die geharde plante ’n heel ander Namakwaland. Eenjarige veldblomme en bolplante kom te voorskyn en die bruin en klipperige landskap verander in die kleur waarvoor die streek wêreldberoemd geword het.
Dit is dalk juis wat Namakwaland se plante so besonders maak: skoonheid hier hoef nie maklike omstandighede te hê om te groei nie.

Die veld wag. Die reën kom. En op sy tyd blom Namakwaland weer.

Foto: Nicola Lombaard